कल्याण : रोशन उबाळे
कल्याण पूर्वेतील गौरीपाडा परिसरात सार्वजनिक जागांच्या सुशोभीकरणासाठी पालिका लाखो रुपये खर्च करत असताना, त्याच परिसरात कर्नाळा मंदिराच्या पटांगणात आठवडी बाजार भरत असल्याचा प्रकार समोर आला आहे. हा बाजार नेमका कोणाच्या परवानगीने भरविला जातो, फेरीवाल्यांकडून जागेच्या नावाखाली पैसे कोणाकडून आणि कोणासाठी गोळा केले जातात, तसेच या बाजारामागे कोणाची हिस्सेदारी आहे, असे अनेक प्रश्न उपस्थित होत आहेत.
गौरीपाडा परिसरातील तलावाचे पालिकेच्या माध्यमातून सुशोभीकरण करण्यात आले आहे. परिसराचा विकास आणि सौंदर्यीकरणासाठी मोठ्या प्रमाणात निधी खर्च करण्यात आला. नागरिकांना स्वच्छ, सुशोभित आणि सुरक्षित सार्वजनिक परिसर उपलब्ध व्हावा, हा या कामामागील उद्देश आहे. मात्र तलावासमोरील कर्नाळा मंदिराच्या परिसरात आणि पटांगणात नियमितपणे आठवडी बाजार भरत असल्याने या सुशोभीकरणाच्या उद्देशावरच प्रश्नचिन्ह निर्माण झाले आहे.
स्थानिकांच्या मते, बाजार भरत असताना मोठ्या संख्येने फेरीवाले आणि विक्रेते येथे येतात. भाजीपाला, फळे, कपडे आणि इतर वस्तूंची विक्री करणारे विक्रेते या ठिकाणी दुकाने थाटतात. सार्वजनिक किंवा मंदिर परिसरात अशा प्रकारे बाजार भरविण्यासाठी आवश्यक परवानगी घेण्यात आली आहे का, याबाबत स्पष्ट माहिती उपलब्ध नसल्याने संशय व्यक्त केला जात आहे.
कल्याण परिसरातील अनेक भागांचा स्मार्ट सिटी आणि सुशोभीकरणाच्या कामांमध्ये समावेश करण्यात आला आहे. रस्त्यांचे नूतनीकरण, दुभाजकांमध्ये वृक्षारोपण, भिंतींवर आकर्षक चित्रकला आणि विविध विकासकामांमुळे परिसराचे रूप बदलण्याचा प्रयत्न करण्यात आला आहे. अशा परिस्थितीत सार्वजनिक जागेचा वापर करून आठवडी बाजार बिनदिक्कतपणे भरत असेल, तर संबंधित यंत्रणा याकडे दुर्लक्ष का करीत आहे, असा सवाल नागरिकांकडून केला जात आहे.
फेरीवाल्यांच्या व्यवसायातून मोठ्या प्रमाणात आर्थिक उलाढाल होत असल्याने अशा बाजारांच्या व्यवस्थापनामागे आर्थिक साखळी कार्यरत असण्याची शक्यता नाकारता येत नाही. बाजारात जागा देण्यासाठी किंवा दुकाने लावण्यासाठी फेरीवाल्यांकडून काही रक्कम घेतली जाते का, घेतली जात असेल तर ती रक्कम कोण गोळा करते आणि त्याचा हिशोब कोणाकडे आहे, याची चौकशी होणे आवश्यक असल्याची मागणी होत आहे.
विशेष म्हणजे रविवार आणि सार्वजनिक सुट्टीच्या दिवशी असे बाजार भरविले जात असल्याचेही निदर्शनास आले आहे. सुट्टीच्या दिवशी महापालिका कार्यालयांतील नियमित प्रशासकीय हालचाल कमी असते. त्यामुळे कारवाई टाळण्यासाठी किंवा संबंधित यंत्रणेचे लक्ष कमी असताना बाजार भरविला जातो का, अशीही चर्चा परिसरात सुरू आहे. काही आठवडी बाजारांवर तातडीने कारवाई होते, तर काही ठिकाणी सातत्याने दुर्लक्ष केले जाते, अशी नागरिकांची तक्रार आहे.
या प्रकरणाबाबत महापालिकेच्या संबंधित अधिकाऱ्यांशी संपर्क साधण्याचा प्रयत्न करण्यात आला. सहाय्यक आयुक्त प्रीती गाडे यांना या संदर्भात माहिती देण्यात आली. मात्र वृत्त लिहिपर्यंत त्यांच्याशी संपर्क होऊ शकला नाही. तसेच अधीक्षक पल्लवी सुपे यांनाही या प्रकाराची माहिती देण्यात आली. त्यांनी कर्मचारी पाठवून कारवाई करण्यात येईल, असे आश्वासन दिल्याचे सांगण्यात आले आहे.
मात्र केवळ आश्वासन न देता प्रत्यक्षात कारवाई होते का, बाजारासाठी परवानगी आहे की नाही याची तपासणी केली जाते का आणि फेरीवाल्यांकडून होत असलेल्या कथित वसुलीची चौकशी होते का, याकडे आता नागरिकांचे लक्ष लागले आहे.
गौरीपाडा परिसरातील विकासकामांवर सार्वजनिक निधी खर्च होत असताना सार्वजनिक जागांचा अनधिकृत व्यावसायिक वापर होऊ नये, ही स्थानिक प्रशासनाची जबाबदारी आहे. त्यामुळे कर्नाळा मंदिराच्या पटांगणात भरणाऱ्या आठवडी बाजाराची तातडीने चौकशी करून, संबंधित परवानग्या आणि आर्थिक व्यवहारांची पडताळणी करावी, अशी मागणी नागरिकांकडून होत आहे.
आता प्रश्न एवढाच आहे—गौरीपाड्यातील या आठवडी बाजाराचा खरा हिस्सेदार कोण? वसुली कोण करतो आणि प्रशासन यावर नेमकी कधी कारवाई करणार?
Leave a Reply