टिटवाळ्यात घरांच्या नावाखाली ५० लाखांची फसवणूक; ७० ते ८० गुंतवणूकदारांना गंडा -

‘रायगड कॉम्प्लेक्स’ आणि ‘श्री समर्थ कृपा चाळ’ प्रकल्पांशी संबंधित प्रकरण; पीडितांना आर्थिक गुन्हे शाखेशी संपर्क साधण्याचे आवाहन

टिटवाळा, प्रतिनिधी : स्वस्त दरात घर मिळवून देण्याचे आमिष दाखवत टिटवाळा पूर्व परिसरातील सुमारे ७० ते ८० गुंतवणूकदारांची जवळपास ५० लाख रुपयांची फसवणूक केल्याप्रकरणी कल्याण तालुका पोलीस ठाण्यात गुन्हा दाखल करण्यात आला आहे. या प्रकरणात घरांसाठी पैसे भरूनही सदनिकांचा ताबा न मिळालेल्या अन्य पीडित नागरिकांनी आवश्यक कागदपत्रे आणि पुराव्यांसह ठाणे ग्रामीणच्या आर्थिक गुन्हे शाखेशी तातडीने संपर्क साधावा, असे आवाहन पोलिसांनी केले आहे.

स्वस्त घरांच्या जाहिरातीद्वारे गुंतवणूकदारांना आकर्षित केले

पोलिसांनी दिलेल्या माहितीनुसार, राजेंद्र वामन मोरे आणि लिना राजेंद्र मोरे या दोघांनी टिटवाळा परिसरातील सर्व्हे क्रमांक २१२/१/प, २१२/१/डी आणि २३४/२२ या जमिनींवर ‘रायगड कॉम्प्लेक्स/चाळ’ आणि ‘श्री समर्थ कृपा चाळ’ या नावांनी गृहप्रकल्प सुरू केले होते. या प्रकल्पांमधील घरांची विक्री करण्यासाठी टिटवाळा पूर्व येथील स्टेशन रस्त्यावरील श्रीनगर कॉम्प्लेक्समध्ये विविध व्यावसायिक नावांनी कार्यालये सुरू करण्यात आली होती. यामध्ये ‘महाराजा एंटरप्रायझेस बिल्डर्स अँड डेव्हलपर्स’, ‘ओम ७८६ एकता डेव्हलपर्स’ आणि ‘आरएनसी ग्रुप बिल्डर्स अँड डेव्हलपर्स’ या नावांचा समावेश होता.

पैसे घेतले, मात्र घरांचा ताबा दिला नाही

सन २०१५ पासून स्वस्त दरात घरे उपलब्ध करून देण्याचे आश्वासन देत संबंधितांकडून गुंतवणूकदारांकडून पैसे स्वीकारण्यात आले. सुमारे ७० ते ८० नागरिकांनी या प्रकल्पांमध्ये गुंतवणूक केली असून, त्यांच्याकडून जवळपास ५० लाख रुपये जमा करण्यात आल्याचा आरोप आहे. मात्र, निर्धारित वेळेत बांधकाम पूर्ण करून घरांचा ताबा देण्यात आला नाही. तसेच जमा केलेल्या रकमेचा स्वतःच्या फायद्यासाठी अपहार केल्याचा आरोपही तक्रारीत करण्यात आला आहे. त्यानंतर संबंधित कार्यालये बंद करण्यात आली आणि भाड्याचे घर सोडून आरोपी पसार झाल्याचे पोलिसांनी नमूद केले आहे.

तक्रारीनंतर गुन्हा दाखल; आर्थिक गुन्हे शाखेकडून तपास

या प्रकरणी चंद्रकांत गोविंद पवार यांच्या तक्रारीवरून कल्याण तालुका पोलीस ठाण्यात गुन्हा नोंदविण्यात आला आहे. भारतीय न्याय संहितेतील संबंधित तरतुदी आणि महाराष्ट्र ठेवीदारांच्या हितसंबंधांचे रक्षण अधिनियम, १९९९ अंतर्गत गुन्हा दाखल करण्यात आला आहे. या प्रकरणाचा पुढील तपास ठाणे ग्रामीणच्या आर्थिक गुन्हे शाखेकडून सुरू आहे.

इतर पीडितांनी पुराव्यांसह संपर्क साधावा

या गृहप्रकल्पांमध्ये पैसे गुंतवून फसवणूक झालेल्या अन्य नागरिकांनी आपल्या गुंतवणुकीशी संबंधित पावत्या, करारपत्रे, बँक व्यवहारांचे तपशील आणि उपलब्ध अन्य पुरावे घेऊन आर्थिक गुन्हे शाखेकडे तक्रार नोंदवावी, असे आवाहन पोलीस निरीक्षक संतोष चव्हाण यांनी केले आहे.

पीडित नागरिकांनी पोलीस अधीक्षक कार्यालयातील आर्थिक गुन्हे शाखा, तिसरा मजला, एअरमार्शल हेमंत चिटणीस मार्ग, ठाणे पोलीस स्कूलसमोर, खारकर आळी, कोर्टनाका, ठाणे पश्चिम येथे संपर्क साधावा. अधिक माहितीसाठी ०२२-२५४१५०१५ या दूरध्वनी क्रमांकावर संपर्क करता येईल.

स्वतःच्या हक्काच्या घरासाठी आयुष्यभराची पुंजी गुंतवणाऱ्या नागरिकांची फसवणूक झाल्याच्या या प्रकरणामुळे टिटवाळ्यातील गृहखरेदीदारांमध्ये चिंतेचे वातावरण निर्माण होण्याची शक्यता आहे. त्यामुळे या प्रकरणाचा तपास पुढे कोणत्या दिशेने जातो आणि आणखी किती पीडित नागरिक तक्रारीसाठी पुढे येतात, याकडे लक्ष लागले आहे.