शहापूर, दि. १३ (प्रतिनिधी / चंद्रकांत देसले) : मृग नक्षत्राला सुरुवात होऊन अनेक दिवस उलटले असले तरी शहापूर तालुक्यात अद्याप समाधानकारक पावसाने हजेरी लावलेली नाही. परिणामी खरीप हंगामाच्या उंबरठ्यावर उभा असलेला बळीराजा चिंतेत सापडला असून, संपूर्ण तयारी करूनही पेरणीला सुरुवात करता न आल्याने शेतकऱ्यांची नजर आता मान्सूनच्या आगमनाकडे खिळली आहे.
तालुक्यातील बहुतांश शेतकऱ्यांनी नांगरणी, वखरणी, जमिनीची मशागत तसेच इतर पूर्वतयारीची सर्व कामे पूर्ण केली आहेत. यंदाच्या हंगामासाठी आवश्यक बियाणे, खते आणि शेतीसाठी लागणारे साहित्यही मोठ्या प्रमाणात खरेदी करण्यात आले आहे. मात्र पावसाच्या प्रतीक्षेमुळे ही सर्व तयारी सध्या थांबून राहिली असून शेतकरी प्रत्यक्ष पावसाच्या आगमनाची वाट पाहत आहेत.
दरवर्षी मृग नक्षत्राच्या सुरुवातीलाच पावसाचे आगमन होत असल्याने खरीप हंगामातील शेतीच्या कामांना वेग येतो. याच काळात भात, नाचणी, वरई आणि इतर पिकांच्या पेरणीला सुरुवात होते. मात्र यंदा मान्सूनने अद्याप अपेक्षित जोर धरलेला नसल्याने शेतकऱ्यांमध्ये अस्वस्थता वाढत आहे. पाऊस आणखी काही दिवस लांबल्यास पेरणीच्या नियोजनावर परिणाम होण्याची शक्यता व्यक्त केली जात असून त्याचा थेट परिणाम उत्पादनावर होण्याची भीतीही व्यक्त केली जात आहे.
ग्रामीण भागात सध्या सर्वत्र पावसाचीच चर्चा रंगताना दिसत आहे. शेताच्या बांधावर, गावच्या चौकात आणि बाजारपेठांमध्ये एकच प्रश्न ऐकू येत आहे, “पाऊस कधी येणार?” पावसाच्या प्रतीक्षेत असलेला शेतकरी वर्ग दररोज आकाशाकडे आशेने पाहत असून, काळे ढग दाटून येण्याची वाट पाहत आहे.
हवामान विभागाने येत्या काही दिवसांत पावसासाठी पोषक वातावरण निर्माण होण्याचा अंदाज व्यक्त केला असला तरी शेतकऱ्यांना आता प्रत्यक्ष पावसाचीच प्रतीक्षा आहे. वेळेत आणि पुरेशा प्रमाणात पाऊस झाल्यास खरीप हंगामाला गती मिळेल, शेतकऱ्यांच्या चेहऱ्यावर पुन्हा समाधान फुलेल आणि शेतीची चाके वेगाने फिरू लागतील. तोपर्यंत मात्र शहापूर तालुक्यातील बळीराजाचे डोळे आभाळाकडेच लागून राहणार आहेत.
Leave a Reply