स्वातंत्र्यदिनाचे औचित्य साधत कळगावच्या चिमुकलीला नवी सायकल व शैक्षणिक साहित्य भेट, बिरवाडीतील विद्यार्थ्यांनाही शालेय साहित्य व खाऊचे वाटप
अजय शेलार
मुरबाड: स्वातंत्र्यदिन म्हणजे केवळ ध्वजारोहण, देशभक्तीपर घोषणा आणि सांस्कृतिक कार्यक्रमांपुरता मर्यादित उत्सव नसून गरजूंच्या आयुष्यात आशेचा किरण निर्माण करणे, त्यांच्या स्वप्नांना बळ देणे आणि सामाजिक बांधिलकी जपणे हेदेखील खऱ्या अर्थाने स्वातंत्र्याचे मूल्य आहे. याच भावनेतून टिटवाळ्यात सामाजिक कार्यात नेहमीच अग्रेसर असलेल्या राजे ग्रुपचे महेश ऐगडे यांनी मुरबाड तालुक्यातील कळगाव येथील ‘पारू’ या मुलीला स्वातंत्र्यदिनाचे औचित्य साधून नवी कोरी सायकल आणि शैक्षणिक साहित्य भेट देत तिच्या चेहऱ्यावर अनमोल हास्य फुलवले. त्याचबरोबर जिल्हा परिषद शाळा बिरवाडी येथील विद्यार्थ्यांना शालेय साहित्य आणि खाऊचे वाटप करून स्वातंत्र्यदिनाला सामाजिक बांधिलकीची जोड दिली.
मुरबाड तालुक्यातील कळगाव या छोट्याशा खेड्यात राहणारी पारू आपल्या गावातील रस्त्यावर अत्यंत मोडकळीस आलेली सायकल घेऊन फिरत होती. त्या सायकलची अवस्था पाहिल्यानंतर कोणाच्याही मनाला चटका लागावा अशीच होती. सायकलला व्यवस्थित टायर नव्हते, रिंगा वाकलेल्या होत्या आणि एकूणच सायकलची अवस्था अत्यंत दयनीय झाली होती. अशाच अवस्थेतील सायकलसोबत पारू रस्त्यावर दिसल्यानंतर एका युवकाने तिची आस्थेने चौकशी केली. त्याने पारू आणि तिच्या मोडकळीस आलेल्या सायकलचा व्हिडिओ तयार करून सोशल मीडियावर प्रसारित केला. पाहता पाहता हा व्हिडिओ आणि रिल सोशल मीडियावर व्हायरल झाली. हा व्हिडिओ विशाल भानुशाली यांच्या निदर्शनास आला. पारूची परिस्थिती पाहून तिच्यासाठी काहीतरी केले पाहिजे, या भावनेतून भानुशाली यांनी ११ ऑगस्ट रोजी ही व्हायरल रिल आपले मित्र आणि टिटवाळ्यातील राजे ग्रुपचे महेश ऐगडे यांना पाठवली. सामाजिक उपक्रमांमध्ये सातत्याने पुढाकार घेणाऱ्या महेश ऐगडे यांना त्यांनी विचारले, “दादा, या मुलीला आपण काही मदत करू शकतो का?” पारूची अवस्था पाहताच महेश ऐगडे यांनी क्षणाचाही विलंब न करता मदतीसाठी होकार दिला. केवळ होकार देऊन ते थांबले नाहीत, तर “या मुलीला नवी सायकल आणि शैक्षणिक साहित्य आपण स्वतः तिच्या गावी जाऊन देऊ,” असा शब्द त्यांनी दिला.
दिलेला शब्द प्रत्यक्ष कृतीत उतरवत स्वातंत्र्यदिनाचे औचित्य साधून महेश ऐगडे यांनी आपल्या सहकाऱ्यांसह मुरबाड तालुक्यातील कळगाव गाठले. पारूच्या शिक्षणासाठी सायकल ही केवळ खेळण्याची किंवा फिरण्याची वस्तू नव्हती, तर तिच्या दैनंदिन प्रवासाचा आधार ठरणारी गरज होती. तिचे गाव आणि शाळा यामध्ये सुमारे दोन किलोमीटरचे अंतर आहे. त्यामुळे नव्या सायकलीमुळे तिचा शाळेपर्यंतचा प्रवास अधिक सोपा होणार आहे. महेश ऐगडे यांनी पारूला नवी कोरी सायकल आणि आवश्यक शैक्षणिक साहित्य सुपूर्द केले. जुन्या, मोडकळीस आलेल्या सायकलीऐवजी आपल्यासमोर उभी असलेली नवी सायकल पाहताच पारूच्या चेहऱ्यावर उमटलेला आनंद उपस्थितांसाठीही भावनिक क्षण ठरला. तिच्या चेहऱ्यावरील ते निरागस हास्य आणि डोळ्यांतील आनंद शब्दांच्या पलीकडचा होता.
सोशल मीडियावर दररोज असंख्य रिल आणि व्हिडिओ व्हायरल होतात. काही क्षण पाहिल्यानंतर ते विस्मृतीतही जातात. मात्र कळगावच्या पारूचा व्हिडिओ विशाल भानुशाली यांनी केवळ पाहिला नाही, तर तिच्या मदतीसाठी पुढाकार घेत तो योग्य व्यक्तीपर्यंत पोहोचवला. महेश ऐगडे यांनीही त्या एका संदेशाची तातडीने दखल घेत प्रत्यक्ष गावात पोहोचून मदत केली. त्यामुळे सोशल मीडियावरील एक व्हायरल रिल अखेर एका गरजू मुलीच्या आयुष्यात सकारात्मक बदल घडविण्याचे माध्यम ठरली. या सामाजिक उपक्रमाची व्याप्ती केवळ पारूला सायकल देण्यापुरती मर्यादित राहिली नाही. स्वातंत्र्यदिनाचे औचित्य साधत राजे ग्रुपचे महेश ऐगडे यांनी मुरबाड तालुक्यातील जिल्हा परिषद शाळा बिरवाडी येथील विद्यार्थ्यांनाही शालेय वस्तूंचे वाटप केले. ग्रामीण भागातील विद्यार्थ्यांच्या शिक्षणाला छोटासा का होईना हातभार लागावा, त्यांच्या चेहऱ्यावर आनंद निर्माण व्हावा, या उद्देशाने शालेय साहित्याबरोबरच विद्यार्थ्यांना खाऊचेही वाटप करण्यात आले. त्यामुळे विद्यार्थ्यांसाठी यंदाचा स्वातंत्र्यदिन अधिक आनंददायी आणि संस्मरणीय ठरला.
स्वातंत्र्यदिनाच्या दिवशी देशभरात राष्ट्रध्वजाला मानवंदना दिली जाते. मात्र समाजातील गरजू मुलांच्या शिक्षणाच्या वाटेतील अडथळे कमी करून त्यांच्या स्वप्नांना पुढे जाण्यासाठी बळ देणे, हीदेखील राष्ट्रसेवेचीच एक कृती असल्याचा संदेश या उपक्रमातून देण्यात आला. एका व्हायरल रिलपासून सुरू झालेला मदतीचा प्रवास पारूच्या दारात नव्या सायकलीच्या रूपाने पोहोचला आणि त्याचबरोबर बिरवाडीतील विद्यार्थ्यांच्या हातात शैक्षणिक साहित्यही आले. एका बाजूला मोडकळीस आलेली सायकल आणि दुसऱ्या बाजूला शिक्षणाची ओढ असलेली पारू. तिची ही परिस्थिती सोशल मीडियामुळे जगासमोर आली; विशाल भानुशाली यांच्या संवेदनशील पुढाकारामुळे ती महेश ऐगडे यांच्यापर्यंत पोहोचली आणि ऐगडे यांनी दिलेला शब्द कृतीत उतरवला. त्यामुळे पारूच्या हातात केवळ नवी सायकल आली नाही, तर तिच्या शिक्षणाच्या वाटेलाच जणू नवी चाके मिळाली. स्वातंत्र्यदिनाच्या पार्श्वभूमीवर घडलेली ही घटना माणुसकी, संवेदनशीलता आणि सामाजिक बांधिलकीचा संदेश देणारी ठरली आहे.
Leave a Reply