टिटवाळा , वार्ताहर : टिटवाळा शहर पुन्हा एकदा थरारले. क्षुल्लक कारणावरून उसळलेल्या संतापाने रक्तरंजित वळण घेत इंदरानगर परिसरात एका डिलिव्हरी कर्मचाऱ्यावर प्राणघातक हल्ला घडवून आणला आणि शांततेचा आव आणणाऱ्या समाजजीवनातील दडलेली हिंस्र प्रवृत्ती उघडी पाडली. शुक्रवारी (दि. २१ फेब्रुवारी) रात्री आठच्या सुमारास घडलेल्या या घटनेने परिसरात भीतीचे सावट पसरले असून नागरिकांमध्ये संतापाची लाट उसळली आहे.
इंदरानगर येथील रहिवासी महेंद्र शेजूळ (वय ४०) हे नियमितप्रमाणे गॅस सिलेंडर वितरणाचे काम पूर्ण करून वाहन पार्क करत असताना ही धक्कादायक घटना घडली. सिलेंडर वेळेत न दिल्याचा राग मनात धरून अर्जुन शर्मा (वय २५) असे आहे (वय २५) याने शाब्दिक वाद घालत परिस्थिती चिघळवली. वादाचे रूपांतर काही क्षणांतच उग्र संघर्षात झाले आणि आरोपीने आपल्या ताब्यातील कोयत्याने शेजूळ यांच्यावर सपासप वार केले. या वेळी त्याच्यासोबत असलेल्या आणखी दोघांनीही हल्ल्यात सहभाग घेतल्याची माहिती समोर आली आहे. अचानक झालेल्या या हल्ल्यात शेजूळ गंभीर जखमी झाले असून त्यांना तातडीने रुग्णालयात दाखल करण्यात आले आहे. त्यांच्यावर उपचार सुरू असून प्रकृती चिंताजनक असल्याचे समजते.
हल्ल्यानंतर आरोपी घटनास्थळावरून पसार झाले असून परिसरात तणावाचे वातावरण निर्माण झाले आहे. या प्रकरणी कल्याण तालुका पोलीस स्टेशन, टिटवाळा येथे गुन्हा दाखल करण्यात आला असून पोलीस यंत्रणा आरोपींच्या शोधासाठी पथके रवाना करून तपासाची चक्रे वेगाने फिरवत आहे. परिसरातील सीसीटीव्ही फुटेज, साक्षीदारांचे जबाब आणि तांत्रिक तपासाच्या आधारे आरोपींना लवकरच अटक होईल, असा विश्वास पोलीस सूत्रांनी व्यक्त केला आहे.
दररोजच्या व्यवहारात उद्भवणाऱ्या किरकोळ कारणांवरून जीवघेणे हल्ले होण्याच्या वाढत्या प्रवृत्तीने समाजमन अस्वस्थ झाले आहे. सार्वजनिक सेवा देणाऱ्या कर्मचाऱ्यांवर होत असलेले असे हल्ले केवळ कायदा-सुव्यवस्थेचे नव्हे, तर सामाजिक संवेदनशीलतेचेही प्रश्न निर्माण करतात. क्षणिक संताप, असहिष्णुता आणि कायद्याची भीती न बाळगता उचललेले शस्त्र अखेरीस एका कुटुंबाच्या आयुष्याला हादरा देऊन जाते. टिटवाळ्यातील ही घटना केवळ गुन्हेगारी आकडेवारीत भर घालणारी नाही, तर समाजाने संयम, संवाद आणि कायद्यावरील विश्वास यांची नव्याने जपणूक करण्याची गरज अधोरेखित करणारी ठरली आहे.
Leave a Reply